тамхиа хугаслаж татдаг зуршилтай болсон мэт санагдана. бяцхан үүрмэгээр нь эвлүүлж наалт тавина.
хундага эхлээд гарт хэдэн минут. сэнгэнэсэн үнэр, сүүмэлзсэн нүд, тэгээд хоосорсон хундаганаас бороо асгарах шиг цэлэлзсэн сэтгэгдэл төрөөд нүдээ дээш өргөнө.
хугас тамхиа эргээгээд асаалаа. энэ зуур хэдэн минут өнгөрөв өө?
Армин ван Бүүрен мөн болохыг таниад орчноо хартал сэтгэл уужирсан бололтой. Текэн дээр хоёр гурваараа хүмүүс, цаана нь тунарсан их утаа, гэрэл, том элий дэлгэц. Хундага харших чимээ энд тэнд. Дүүрэн цэнэгтэй нисч яваа хөлөг шиг орчинд нүдэнд үзэгдэх бүхэн танил. гадаад орчин, өөр ертөнц гэж байхгүй, ингээд л эрх зоргоороо хөвөн яваа ертөнц цор ганц үнэн юм шиг. унаа тэргээр энэ хооронд ирж буцах хүмүүсийн царайнаас олон ертөнцний өнгийг үзэж, ингэсгээд өөрийн олсон үнэндээ ойрхон байх нь дээр гэдгийг сурмагхан хараад суудлаа засч дахин нэг хундага.
хэдэнтээ энд тааралдсан хүмүүст займчих шаардлага үгүй, хэдэн өнцгийг сольж хөлхөлдсөөр, бүжсээр, зөрөлдсөөр, сууцгаасаар гадаа сар тойргоо гүйцээж хундага харших чимээ энд тэндгүй, тоаст, доргилт, савалт хаа сайгүй.
итгэлтэй харц, чөлөөтэй хөдөлгөөн, иймээ тиймээ юмгүй, илбэчин хөгжим тасралтгүй, ухаан санаа балартамгүй хөгжин дэвсээр, хөөрөн ниссээр, хүрсэн очсон сэтгэгдэлдээ бүгд доргиун шаагин буцална. Хотын нэг өнцөгт бургилж ундарсан эрч хүчийн тойрог зүүдэн дундаа шуугилдсан бусад хүмүүсээс онхи холд харгин хальж бадрана.
Цэл залуу эрчим хүчний цугалбар, цахилах гэрлийн үелзэл дэх тааламжтай байдал, фаяар ремикс ба түүний доргилт.
Хөх туяа татуулсан хундаганы ирмэгээр галын дөл хувьсалзан бадарч байгаад хэдэн хормын дараа миний дотор улалзана. Хэн зохицуулж чадна түүнээс нэмэх энергит атом ялгарна. тэр түүний өөрийн олз, тэгээд цаашаа дахиад. Ийм ертөнцийн хэмнэлийг зөвхөн хөгжмөөр мэдрэнэ. Хөг, айзмаар нь бүхний санаанд газарч хийж, үе шат бүрээр нь хөтлөн дагуулсаар, цоргисон хэмнэлээр нь соронзлогдон нээсээр тэнд хүрнэ. Бичих, зураг бололцоо зөвхөн ганцхан агшинг дүрслэх ажилтай. Зовхио цавчлаад дахиад орчноо мэдэр, бодлоосоо татгалзан мэдрэмжээ дагаад цаашаа. Цагаан элст далайн эрэг, сэвшээ салхины амт, шаргал улаан туяагаар гийх тэнгэрийн хаяа. Тэндээс мандах том цагаан наран. Цагаан нүхний соронзон, цагаан тахал, цахилж яваа сэтгэгдлийн ертөнц бид бүгд дайвалзан нисэлдэж явна.